[]في البداية من جنت نطفه عبالي إني من كريات الدم البيضاء
ماعرفت إني من بني البشر إلا لما كالت( الدكتوره ) لأمي مبرووكـ إنتي حامل
عاد أمي من الفرحة حطت أيدها على بطنها في المكان اللي أنا موجود بيه عرفت إني المقصود وفهمت إني مشروع آدمي . .
بيني وبينكم ضاق صدري .. كلت شريد بوجع الراس أطلع لعالم ثاني وأصير إنسان وفي حساب وعقاب ودارسه و....
كلي عقلي إحمد ربك يا ولد تطلع ويصير عندك إيميل وماسنجر 8 صحيح أنه احيانا مقرف بس ما يهم وتشترك في منتديات ,,
كلت(لعقلي) ورح أصير مشرف همين في منتدى
كلي : كُلّ تبن إلا هاي .,
فرحت أني كلت تمام هسة يعني رح اطلع ؟؟ قال ماكاعد الله وياك باقي تسع شهور (تحطيم)ـ .,
المهم ,,,
ولما صار خمس شهور جنت حاس إني ذكر بس كلت يمكن أكون بنت
الله على كل شي قدير ,,,,
كعدت أكطع الشعيرات الدمويه وأكول ولد ..بنية.. صبي صبيه.. فتاة..غلام
وأني دا افكر أفكر سمعت صوت أبوية يحجي وية أمي حاولت أركز شنو دايكولها قربت إذني طلع أبوية دايتغزل بأمي
ردت اتصل عليهم وأكول إستحوا أني دا اسمعكم
ولكن للأسف ,,,
لم تسنح لي الفرصه
بصراحه إستحيت من كلام أمي وأبوية كلت أنام أحسن لي عيب أتصنت عليهم بعدين يعاقبني ربي
ويصير ابني يتصنت علية
كعدت أرضع بـ اصبع رجلي لحد ما نمت وبعد فتره من الزمن سمعت صوت قوووي يتجه ناحيتي كمت بطولي
إلا وارتطم راسي ببطن أمي
آآآآخ
بس قوة الصوت نستني الوجع الله لا يوريكم
كأنه شلااال مدهدر علية حاولت انهزم
منا منا... ماكو مجال
الحمدلله
ربي ستر وما تأذيت وطلعت أمي الله يهديها
شربت مي بكميه كبيره على غير العاده بس والله تونست كعدت ألعب بالمي برجلي جنت اسبح بس للأسف ما عندي مااايوه ..
لما جاء الشهر السابع راحت أمي وياها أبوية للدكتوره تطمئن أمي على صحتها
طبعا نامت أمي على السرير وابوية واكف يمها
كلت النفسي
ليش كل هذا يا ماما هو انتي حامل بطنطل !!
الدكتوره حطت جهاز على بطن أمي وبدأت تحرك يمين يسار فوق تحت وهمة دايشوفوني على الشاشه
عاد أني كمت أتدلع واحرك رجلي وأفتح عيوني وأغمضها بنعومه .,
وأمي وأبوية يتبادلون نظرات الحب والرومانسيه ويبتسموااا ومن شالت شالت الجهاز وإنقطعت عن الرؤيه
سألت أمي الدكتوره متى موعد الولادة كالت باقي شهرين سمعت الخبر
ويجيني إنهيار عصبي شهرين يا خبيثة
خلص أني تحطمت اعصابي أنكتمت الجووو حار و الكهرباء مكطوعة
كلت مايصبرنا غير النوم ونمت شهرين (نومة أهل الكهف)
كعدت من النوم وحسيت بملل وفراغ قاتل حاولت أرفه عن نفسي ورحت ألعب لعبة الحبل بإستخدام الحبل السري
وبديت اكمز وأغني واحد اثنين ثلاثه هيييييييييييييييه ...
وفجأه من قوة التكمز تزحلكت وأنكلب يصير راسي جوة ورجلي فوك كامت أمي تعيط .,
أخذها أبوية بسرعة لأقرب مستشفى كال الطبيب هاي ولااااااااده
لما سمعت الخبر
طرت من الفرح ..
وبديت أكشخ وارتب حالي أستعد للقاء الأول مع صديقي بالحضانه
وأمي كل شوية تتعالى صرخاتها حطوها على السرير متوجهين لغرفة الولاااااده
وأبوية يمشي يمها
ويكولها لاتخافين اني وياج
تردله أمي أخاف أموت واني اولد ,
أبوية رد عليها
والدموع تنهمر من عينيه
الله يجعل يومي كبل يومج
.... متأثرين بالأفلام
وأنا كلت أول ما وصلنا لغرفة الولاده
إنكتمنا ياهوه هوّوووووووونا .,
طبعاً نقلوا أمي لسرير الموجود بالغرفه وجاء الدكتور وياه الممرضات .,
كال الدكتور لأمي
زفيييييييييير أمي فهمتها بالعكس
وسوتها شهييييييييييق
واذا اني اللي أنشفط وأدخل جوّووة
دكيت أمي بعكس
كلتلها يكولج زفير زفير
الظاهر أمي سمعتني
وزفرت زفرة
وتدفعني أمي بقوه وأنا طلع سرعتي 180 ميغاهيرتز
وطلع كل شي بيه الا خشمي
كلت لاااااااااااا هذا اللي جنت خايف منه
صاح الدكتور الطاقم الطبي ععلمود يطلعون خشمي حاولوا
المره الأولى
والثانيه ما نفعت
و وية ثالث محاوله طلعوه
( الثالثه ثابته )
كمت أبجي وأكول للدكتور غض البصر
وتشيلني الممرضة على يدها وتلفني بشي الأبيض
ياسلاااااااام
و ابتدت حياتي]وشكرا مع تحيات سيف الدين
الأحد نوفمبر 22, 2009 3:00 pm
